એજન્ટ વિના જ ડ્રાઈવિંગ લાઈસન્સ કઈ રીતે કઢાવશો? Very Useful Information

હવે ઘણી ઈઝી થઈ ગઈ છે પ્રોસેસ

સરકારી ઓફિસોમાં આપણે કોઈ પણ કામ હોય તો સૌ પહેલા આપણે એજન્ટ શોધીએ છીએ. સામાન્ય રીતે આપણા મનમાં એવું હોય છે કે એજન્ટ વગર સરકારી ઓફિસોમાં કશુંય કામ નથી થતું. જોકે, હવે એવું નથી રહ્યું. હવે મોટાભાગની સિસ્ટમ ઓનલાઈન થઈ જતાં તમે પણ તમારું કામ સરળતાથી કરી શકો છો. આવું જ એક કામ છે લર્નિંગ કે પછી પાકું લાઈસન્સ મેળવવા માટેનું. RTOમાં તમે જશો તે સાથે જ તમને સૌ પહેલા એજન્ટો જ મળી જાય છે, પરંતુ એજન્ટ વગર જ તમે કઈ રીતે સરળતાથી લાઈસન્સ મેળવી શકો છો તે જાણી લો..

સૌ પહેલા ઓનલાઈન અપોઈન્ટમેન્ટ લો

ગુજરાતમાં હવે લર્નિંગ તેમજ પાકા ડ્રાઈવિંગ લાઈસન્સની બધી જ કામગીરી ઓનલાઈન જ થાય છે. જેના માટે તમારે www.sarathi.nic.in નામની વેબસાઈટ પર જવાનું છે. આ વેબસાઈટ કેન્દ્ર સરકારનું માર્ગ અને પરિવહન મંત્રાલય ઓપરેટ કરે છે. તેના પરથી તમે કાચું તેમજ પાકું લાઈસન્સ મેળવવા માટેની અપોઈન્ટમેન્ટ લઈ શકો છો.

લર્નિંગ લાઈસન્સ માટે શું કરવું?

તમારે લર્નિંગ લાઈસન્સ નવું લેવું હોય કે પછી તેને રિન્યૂ કરાવવું હોય તો તેના માટે તમારે www.sarathi.nic.in પરથી અપોઈન્ટમેન્ટ લેવાની છે. વેબસાઈટના હોમ પેજ પર જ સારથી લાઈસન્સ સર્વિસીસમાં તમને પહેલી જ લિંક તેના માટેની મળશે. અહીં લર્નિંગ કે પાકાં લાઈસન્સ માટે અપ્લાય કરવાની લિંક એક જ છે. પરંતુ તમે તેના પર ક્લિક કરશો ત્યારે તમને બે અલગ-અલગ ઓપ્શન મળી જશે.

તમારી વિગતો ભરો

લર્નિંગ લાઈસન્સનું ઓપ્શન સિલેક્ટ કર્યા બાદ તમારે તમારી વિગતો ઓનલાઈન ફોર્મમાં ભરી દેવાની છે. તમારું નામ કે એડ્રેસ લખતી વખતે તેમાં કોઈ ભૂલ ન હોય તે ખાસ ધ્યાન રાખશો. જે વિગતો આપવી ફરજિયાત છે તેના પર તમને લાલ કલરની ફુદડી જોવા મળશે. અહીં તમારે તમારા એરિયામાં કઈ આરટીઓ ઓફિસ લાગુ પડે છે તે પણ માહિતી આપવાની છે. આટલું કર્યા પછી તમારે તમારી ઉંમર તેમજ એડ્રેસ પ્રુફની સોફ્ટ કોપી અપલોડ કરવાની છે. આટલું કરશો ત્યાર પછી તમે ફોર્મ સબમિટ કરી શકશો. ફોર્મનો નંબર ખાસ નોંધી લેશો. ફોર્મ ભરી દીધા બાદ ફરી હોમ પેજ પર આવીને અપોઈન્ટેન્ટ સ્લોટ બૂકિંગમાં જઈને તમે અપોઈન્ટમેન્ટ લઈ શકો છો. એટલું ધ્યાન રાખશો કે તમારે અહીં કોઈ પણ પ્રકારનું પેમેન્ટ કરવાનું નથી. જે દિવસની અપોઈન્ટમેન્ટ હોય તે દિવસે તમારે ફોર્મ-2ની કોપી તેમજ ડોક્યુમેન્ટની ફોટોકોપી અને ઓરિજિનલ લઈને જવાના છે. અહીં જ તમારે નિયત ફી ભરવાની છે, અને જો તમારી પાસે કોઈ પાકું લાઈસન્સ ન હોય તો તમારે ઓનલાઈન એક્ઝામ પણ આપવી પડશે. પરંતુ જો તમારી પાસે ટુ-વ્હીલરનું પાકું લાઈસન્સ હોય અને તમે ફોર વ્હીલરનું લર્નિંગ લાઈસન્સ લેવા જશો તો તમારે ઓનલાઈન એક્ઝામ આપવાની કોઈ જરુર નથી.

પાકા લાઈસન્સ માટે શું કરશો?

પાકું લાઈસન્સ મેળવવા પણ તમારે લર્નિંગ લાઈસન્સની માફક જ ઓનલાઈન ફોર્મ ભરવાનું છે, તેમાં તેની સાથે તમારે લર્નિંગ લાઈસન્સનો નંબર પણ આપવો પડશે. એટલું ધ્યાન રાખશો કે લર્નિંગ લાઈસન્સ મેળવ્યાના 30 દિવસ બાદ જ તમે પાકા લાઈસન્સ માટે અપ્લાય કરી શકો છો. અહીં પણ તમારે ફી આરટીઓમાં જઈને જ ભરવાની છે. તમે જે ફોર્મ ભરો છો તેની પ્રિન્ટ લેવાનું પણ ન ભૂલશો.

સાભાર : આઈ એમ ગુજરાત

ટીપ્પણી

No comments yet.

Leave a Reply

error: Content is protected !!