આજે અચૂક માણો આ બાળગીતોનો આપણો ખજાનો

0
6

 

happy-children-2012-smsquotespoemswishescardsgreetingsend-e-cardsfull-download

 

નાના ભૂલકાં સાથે બાળક જેવા થઈને રહેવું, નાચવું, ગાવું અને રમવું એના જેવી મજા બીજી કોઈ નથી. એ માટે જોઈતાં હાલરડાં, જોડકણાં અને બાળગીતોનો આપણો ખજાનો વિશાળ છે. તેમાંથી ચાખવા જેવી થોડી વાનગી અહીં પીરસી છે. યાદ રાખજો કે અહીં જે લખાણ આપ્યું છે તે બાળકોને વંચાવશો નહિ, તે લખાણ અને ગીતો તમારા વાચવાં માટે છે; એ લખાણ તમારે બાળકોને વાંચી સંભળાવવાનું છે, ગીતો તમારે ગાઈ બતાવવાના છે અને ગવડાવવાના છે. બાળકોને આ ગીતો કરતાં પણ વધુ જરૂર તમારી છે એ વાત કદી ભૂલશો નહિ.

 

 

વાર્તા રે વાર્તા

 

વારતા રે વારતા

ભાભો ઢોર ચારતા

ચપટી બોરા લાવતા

છોકરાંને સમજાવતા

એક છોકરો રિસાણો

કોઠી પાછે ભીંસાણો

કોઠી પડી આડી

છોકરે રાડ પાડી

અ ર ર ર ર માડી

 

મેં એક બિલાડી

 

મેં એક બિલાડી પાળી છે

તે રંગે બહુ રૂપાળી છે

તે હળવે હળવે ચાલે છે

ને અંધારામાં ભાળે છે

તે દૂધ ખાય દહીં ખાય

ઘી તો ચપ ચપ ચાટી જાય

તે ઉંદરને ઝટ પટ ઝાલે

પણ કૂતરાથી બીતી ચાલે

તેના ડીલ પર ડાઘ છે

તે મારા ઘરનો વાઘ છે

 

એક બિલાડી જાડી

 

એક બિલાડી જાડી

તેણે પહેરી સાડી

 

સાડી પહેરી ફરવા ગઈ

તળાવમાં તે તરવા ગઈ

 

તળાવમાં તો મગર

બિલ્લીને આવ્યા ચક્કર

 

સાડીનો છેડો છૂટી ગયો

મગરના મોઢામાં આવી ગયો

 

મગર બિલ્લીને ખાઈ ગયો

 

હાલરડું

 

હાલા રે વાલા મારા ભઈલાને

હાં…હાં…હાં…હાં

 

ભઈલો મારો ડાહ્યો

પાટલે બેસી નાહ્યો

પાટલો ગયો ખસી

ભઈલો પડ્યો હસી

હાલા રે વાલા મારા ભઈલાને

હાં…હાં…હાં…હાં

 

ભાઈ મારો છે સાગનો સોટો

આવતી વહુનો ચોટલો મોટો

ભાઈ મારો છે વણઝારો

એને શેર સોનું લઈ શણગારો

હાલા રે વાલા મારા ભઈલાને

હાં…હાં…હાં…હાં

 

હાલા રે વાલા મારી બેનડીને

હાં…હાં…હાં…હાં

 

બેની મારી છે ડાહી

પાટલે બેસીને નાહી

પાટલો ગયો ખસી

બેની પડી હસી

હાલા રે વાલા મારી બેનડીને

હાં…હાં…હાં…હાં

 

બેની મારી છે લાડકી

લાવો સાકર ઘીની વાડકી

ખાશે સાકર ઘી મારી બેની

ચાટશે વાડકી મિયાંઉમીની

હાલા રે વાલા મારી બેનડીને

હાં…હાં…હાં…હાં

 

પાપા પગલી

 

પાપા પગલી ધૂળની ઢગલી

ઢગલીમાં ઢેલ જીવે મારી બેન

 

પાપા પડિયા થોડુંક રડ્યાં

રડતાં રડતાં આંસુડાં ખર્યાં

 

પાપા પોળી ઘીમાં ઝબોળી

ચોળીને ખાજો તાજામાજા થાજો

 

તાજામાજા થાજો

તાજામાજા થાજો

 

અડકો દડકો

 

અડકો દડકો દહીં દડુકો

શ્રાવણ ગાજે પીલું પાકે

 

ઊલ મૂલ ધંતુરાનું ફૂલ

સાકર શેરડી ખજૂર

 

ખજરે ખજરે આમ છે

પીતામ્બર પગલાં પાડે છે

 

મોર પાણી ભરે છે

ઢેલ પાણી ઢોળે છે

 

રાજિયો ભોજિયો

ટીલડીનો ટચાકીયો

 

મામાનું ઘર કેટલે

 

મામાનું ઘર કેટલે

દીવો બળે એટલે

 

દીવો મેં તો દીઠો

મામો લાગે મીઠો

 

તાળી વગાડે છોકરાં

મામા લાવે ટોપરાં

 

ટોપરાં તો ભાવે નહિ

મામા ખારેક લાવે નહિ

 

મામી મારી ભોળી

મીઠાઈ લાવે મોળી

 

મોળી મીઠાઈ ભાવે નહિ

રમકડાં તો લાવે નહિ

 

મામે સામું જોયું

મારું મનડું મોહ્યું

 

મામાનું ઘર કેટલે

દીવો બળે એટલે

 

ચકીબેન ચકીબેન

 

ચકીબેન ચકીબેન

મારી સાથે રમવા

આવશો કે નહિ આવશો કે નહિ

 

બેસવાને પાટલો

સૂવાને ખાટલો

ઓઢવાને પીંછા

આપીશ તને હું આપીશ તને

 

ચકીબેન ચકીબેન

મારી સાથે રમવા

આવશો કે નહિ આવશો કે નહિ

 

પહેરવાને સાડી

મોરપીંછાવાળી

ઘમ્મરિયો ઘાઘરો

આપીશ તને હું આપીશ તને

 

ચકીબેન ચકીબેન

મારી સાથે રમવા

આવશો કે નહિ આવશો કે નહિ

 

ચક ચક કરજો

ચીં ચીં કરજો

ખાવાને દાણા

આપીશ તને હું આપીશ તને

 

ચકીબેન ચકીબેન

મારી સાથે રમવા

આવશો કે નહિ આવશો કે નહિ

 

બા નહિ બોલશે

બાપુ નહિ વઢશે

નાનો બાબો તો

ઊંઘી ગયો ઊંઘી ગયો

નાનો બાબો તો

ઊંઘી ગયો ઊંઘી ગયો

 

એકડે એક

 

એકડે એક પાપડ શેક

બગડે બે ચોપડી લે

 

ત્રગડે ત્રણ વેઢા ગણ

ચોગડે ચાર બેડો પાર

 

પાંચડે પાંચ કવિતા વાંચ

છગડે છ ન શીખે તે ઢ

 

સાતડે સાત સાંભળો વાત

આઠડે આઠ લખજો પાઠ

 

નવડે નવ લડશો નવ

એકડે મીંડે દશ હવે બસ

 

નાની મારી આંખ

 

નાની મારી આંખ

એ જોતી કાંક કાંક

એ તે કેવી અજબ જેવી વાત છે

 

નાના મારા કાન

એ સાંભળે મીઠા ગાન

એ તે કેવી અજબ જેવી વાત છે

 

નાક મારું નાનું

એ સુંઘે ફૂલ મજાનું

એ તે કેવી અજબ જેવી વાત છે

 

નાની મારી જીભ

એ માણે પીપરમીન્ટ

એ તે કેવી અજબ જેવી વાત છે

 

નાના મારા હાથ

એ તાળી પાડે સાથ

એ તે કેવી અજબ જેવી વાત છે

 

નાના મારા પગ

એ જલદી ભરે ડગ

એ તે કેવી અજબ જેવી વાત છે

 

મારો છે મોર

 

મારો છે મોર મારો છે મોર

મોતી ચરંતો મારો છે મોર

 

મારી છે ઢેલ મારી છે ઢેલ

મોતી ચરંતી મારી છે ઢેલ

 

મારો છે મોર મારો છે મોર

રાજાનો માનીતો મારો છે મોર

 

મારી છે ઢેલ મારી છે ઢેલ

રાણીની માનીતી મારી છે ઢેલ

 

બોલે છે મોર બોલે છે મોર

સોનાને ટોડલે બોલે છે મોર

 

બોલે છે ઢેલ બોલે છે ઢેલ

રૂપાને બારણે બોલે છે ઢેલ

 

ચાંદો સૂરજ રમતા’તા

 

અમે ચાંદો સૂરજ રમતા’તા

રમતાં રમતાં કોડી જડી

કોડીનાં મે ચીભડાં લીધાં

ચીભડે મને બી દીધાં

 

બી બધાં મે વાડમાં નાખ્યાં

વાડે મને વેલો આપ્યો

વેલો મેં ગાયને નીર્યો

ગાયે મને દૂધ આપ્યું

 

દૂધ મેં મોરને પાયું

મોરે મને પીછું આપ્યું

પીંછુ મેં બાદશાહને આપ્યું

બાદશાહે મને ઘોડો આપ્યો

 

ઘોડો મેં બાવળિયે બાંધ્યો

બાવળે મને શૂળ આપી

શૂળ મેં ટીંબે ખોસી

ટીંબે મને માટી આપી

 

માટી મેં કુંભારને આપી

કુંભારે મને ઘડો આપ્યો

ઘડો મેં કૂવાને આપ્યો

કૂવાએ મને પાણી આપ્યું

 

પાણી મેં છોડને પાયું

છોડે મને ફૂલ આપ્યાં

ફુલ મેં પૂજારીને આપ્યા

પૂજારીએ મને પ્રસાદ આપ્યો

 

પ્રસાદ મેં બાને આપ્યો

બાએ મને લાડવો આપ્યો

એ લાડવો હું ખાઈ ગ્યો

ને હું આવડો મોટો થઈ ગ્યો

 

અમે ફેર ફુદરડી

 

અમે ફેર ફુદરડી રમતા’તા

અમે ફેર ફુદરડી રમતા’તા

ફેર ફુદરડી ફરતાં ફરતાં

પડી જવાની કેવી મજા

ભાઈ પડી જવાની કેવી મજા

 

અમે સંતાકુકડી રમતા’તા

અમે સંતાકુકડી રમતા’તા

સંતાકુકડી રમતાં રમતાં

પકડાઈ જવાની કેવી મજા

ભાઈ પકડાઈ જવાની કેવી મજા

 

અમે આમલી પીપળી રમતા’તા

અમે આમલી પીપળી રમતા’તા

આમલી પીપળી રમતાં રમતાં

સંતાઈ જવાની કેવી મજા

ભાઈ સંતાઈ જવાની કેવી મજા

 

અમે બિલ્લી ઉંદર રમતા’તા

અમે બિલ્લી ઉંદર રમતા’તા

અમે ચું ચું મ્યાઉં મ્યાઉં કરતા’તા

અમે ચું ચું મ્યાઉં મ્યાઉં કરતા’તા

ચું ચું મ્યાઉં મ્યાઉં કરતાં કરતાં

નાસી જવાની કેવી મજા

ભાઈ નાસી જવાની કેવી મજા

 

અમે સાતતાળી રમતા’તા

અમે સાતતાળી રમતા’તા

સાતતાળી રમતાં રમતાં

દોડી જવાની કેવી મજા

ભાઈ દોડી જવાની કેવી મજા

 

ચણ ચણ બગલી

 

ચણ ચણ બગલી ચણાની દાળ

ઠેકો માર્યો ઠુમકદાર

શેરીએ શેરીએ ઝાંખા દીવા

આવ રે કાગડા કઢી પીવા

 

મારામાં કાંકરી ખૂંચે છે

મારામાં કાંકરી ખૂંચે છે

 

ગણ ગણ ગાંઠીયા તેલની પળી

ઊઠ રે લાલિયા ઝૂંપડી બળી

બળતી હોય તો બળવા દે ને

ઠરતી હોય તો ઠરવા દે

આવ રે કાગડા કઢી પીવા

 

મારામાં કાંકરી ખૂંચે છે

મારામાં કાંકરી ખૂંચે છે

 

ચોકમાં દાણા નાખ્યા છે

 

આવો પારેવા

આવોને ચકલાં

ચોકમાં દાણા નાખ્યા છે

 

આવો પોપટજી

મેનાને લાવજો

ચોકમાં દાણા નાખ્યા છે

 

આવોને કાબરબાઈ

કલબલ ન કરશો

ચોકમાં દાણા નાખ્યા છે

 

બંટી ને બાજરો

ચોખા ને બાવટો

ચોકમાં દાણા નાખ્યા છે

 

ધોળી છે જાર ને

ઘઉં છે રાતડા

ચોકમાં દાણા નાખ્યા છે

 

નિરાંતે ખાજો

નિરાંતે ખૂંદજો

ચોકમાં દાણા નાખ્યા છે

 

બિલ્લી નહિ આવે

કુત્તો નહિ આવે

ચોકમાં દાણા નાખ્યા છે

 

ચણ ચણ ચણજો

ને ચીં ચીં કરજો

ચોકમાં દાણા નાખ્યા છે

ટીપ્પણી

LEAVE A REPLY

Please enter your comment!
Please enter your name here